Սեպտեմբերի 12-ից իր դռները կբացի եվրոպական ամենահեղինակավոր ավտոցուցահանդեսը` Ֆրանկֆուրտի ավտոսրահը: Թվով արդեն 65-րդ ցուցահանդեսն այս տարի պատրաստել է մեծ թվով անակնկալներ եւ պրեմիերաներ:
Auto.am-ը հերթական անգամ հրավիրված է լուսաբանելու միջոցառումը, եւ սեպտեմբերի 9-ից մինչեւ 12-ը մենք կլուսաբանենք ավտոսրահի ամենահետաքրքիր պրեմիերաները:
Հատուկ ուշադրություն կդարձնենք այն մակնիշներին, որոնք ներկայացված են Հայաստանում եւ այն ավտոմեքենաներին, որոնք ապագայում վաճառվելու են մեր շուկայում, ինչպես նաեւ Renault-ի տաղավարին, քանի որ մենք գտնվելու ենք Ֆրանկֆուրտում հենց Renault-ի հրավերով:
Մեր համագործակցությունը դարձել է լավ ավանդույթ: Renault-ի հատուկ վերաբերմունքը Հայաստանին եւ մեր կայքին ցույց է տալիս, որ այս բրենդը կարեւորություն է տալիս նույնիսկ ոչ շատ մեծ շուկաներին, ինչպիսին է հայաստանյանը: Ինչպես նշում են Renault-ում, «մեզ համար կարեւոր է ցանկացած շուկա եւ մեր ավտոմեքենայի ցանկացած գնորդը»:
Եվ այսպես, տեսնենք, թե ինչ հետաքրքիր պրեմիերաներ են սպասում մեզ Ֆրանկֆուրտում:
Սկսենք մեր հովանավորից: Renault-ն որոշ տվյալներով ներկայացնելու է թարմացված Renault Kolos-ը եւ Renault Latitude-ը, ինչպես նաեւ դեռ չհաստատված պրեմիում դասի նոր ավտոմեքենայի կոնցեպտը եւ փոքր-ինչ թարմացված Dacia Duster-ը:
Մեկ այլ “ֆրանսիացի” ` Citroen-ը, կներկայացնի նոր կոնցեպտուալ քրոսովերը “կծող” անունով` Citroen Cactus:
Peugeot-ն նույնպես ետ չի մնում, եւ պատրաստել է մի շարք պրեմիերաներ. լիովին նոր Peugeot 308 մոդելը, Peugeot 3008 կոմպակտ քրոսովերի Hybrid4 տարբերակը, մեկ անակնկալ նոր մոդել` Peugeot 5008 մինիվեն-ը եւ իր ամենագեղեցիկ ավտոմեքենաներից մեկի` Peugeot RCZ սպորտային կոպեի R-տարբերակը (նախնական տվյալներով 260 ձիաուժանոց!):
Ամերիկացիների ներկայությունը մեծաթիվ չի լինի, այնուամենայնիվ, կլինեն մի քանի հետաքրքիր պրեմիերաներ:
Chevrolet-ն իր ամենահայտնի մոդելի` Camaro Convertible-ի նորամուտը պլանավորում է հենց Ֆրանկֆուրտում` 6.2 լիտրանոց շարժիչով եւ 426 ձիաուժ հզորությամբ: Կներկայացնի նաեւ նորացված Camaro SS-ը:
Ամենահայտնի ամերիկացին` Ford-ը պատրաստել է երկու պրեմիերա. հաջորդ սերնդի S-Max MPV մինիվենը եւ նոր Ford Mondeo-ի Vingale կոնցեպտը: Ford-ը հայտարարել է որ Vingale սուբբրենդի տակ պատրաստվում է թողարկել պրեմիում դասի ավտոմեքենաներ: Տեսնենք, թե ինչ կստացվի:
Ճապոնացիները պատրաստվել են ավելի լուրջ ու ներկայանալու են մեծաթիվ պրեմիերաներով:
Toyota-ն կներկայացնի իր ամենավաճառվող ու հայտնի ավտոմեքենայի՝ Corolla-ի եվրոպական պրեմերան: Իր հաջորդ պրեմերան կլինի, ոչ պակաս հայտնի Land Cruiser Prado-ն` կոսմետիկ փոփոխություններով: Toyota-ն կփորձի զարմացնել իր ջրածնային նոր ավտոմեքենայով, որը պլանավորում է արտադրել 2015 թվականից եւ կներկայացնի իր փոքրիկ, բայց շատ աշխույժ հիբրիդով` 420 ձիաուժանոց Toyota Yaris Hybrid-R կոնցեպտով:
Nissan-ը պատրաստել է թարմացված Micra-ն եւ իր այս տարվա ամենակարեւոր պրեմերաներից մեկը` նոր Nissan X-Trail-ը:
Իսկ Nissan-ի ազգական՝ պրեմիում դասի Infiniti-ն, կներկայացնի Q30 կոմպակտ հեթչբեքի կոնցեպտը:
Honda-ն պատրաստ է հանրությանը ներկայացնել իր լիովին նոր Civic Tourer մոդելը, որն իր կարծիքով մրցելու է VW Variant-ի հետ: Կներկայացվի թարմացված Civic Type-R, որը նույնպես մրցակցելու է VW մեկ այլ մոդելի` Golf GTI-ի հետ:
Կորեացիները ճապոնացիներից հետ չեն մնալու, շատ շուկաներում նույնիսկ արդեն առաջ են անցել եւ ագրեսիվ գրավում են նոր շուկաներ: Ֆրանկֆուրտում ներկայացվելու են 3 մոդելներ` ֆուտուրիստական Kia Niro-ն , որը մրցակցելու է Nissan Juke-ի հետ, թարմացված Kia Soul-ը եւ բիզնես դասի թարմացված Optima-ն:
Անգլիացիները կներկայանան թարմացված Land Rover Discovery-ով, նորացված Jaguar XJ-ով, 521 ձիաուժանոց Bentley Continental GT կաբրիոլետով եւ երեւի թե ամենասպասվող պրեմերաներից մեկով՝ Jaguar մակնիշի առաջին C-X17 քրոսովերով:
Իտալացիներից նշենք ամենագեղեցիկ եւ հայտնի մակնիշներին: Ferrari-ն կներկայացնի 458 Italia մոդելի ավելի հզոր տարբերակը` 597 ձիաուժանոց մոդելը, իսկ Lamborghini-ն կցուցադրի Gallardo մոդելի վերջին թարմացված տարբերակը: Նշում են, որ սա կլինի այս մոդելի վերջին թարմացումը:
Եվ իհարկե, մի շարք կարեւոր պրեմիերաներ են պատրաստել ավտոսրահի տերերը. գերմանական եռյակը իրենց սատելիտ մակնիշներով պատրաստվում է հանրությանը կրկին ցուցադրել, թե ով է եղանակ ստեղծում ավտոաշխարհում:
Շվեդական Volvo-ն հնարավոր է զարմացնի վերջերս համացանցում հայտնված նոր կուպե կոնցեպտով
Mercedes-Benc-ը կներկայացնի 4-ից ավել կարեւոր մեքենաներ. լիովին նոր S63 AMG մոդելը 577 ձիաուժով եւ բի-տուրբո V8 շարժիչով, բնական գազով եւ դիզելային վառելիքով աշխատող E դասի մոդելները, S դասի հիբրիդային մոդելը, եւ լիովին նոր GLA մոդելը: Հնարավոր է տեսնենք նաեւ S դասի կուպեն:
BMW այս ավտոսրահին պատրաստվել է զարմացնել բոլորին եւ ներկայացնել ամենամեծ թվով պրեմիերաները: Մոտ 7 նորացված եւ նոր մոդելներ. վերջին ժամանակների ամենագեղեցիկ մոդելներից մեկը՝ 4-րդ սերիայի կուպեն, 2014 թվականի 5-րդ սերիաի թարմացված GT, Tuorin եւ M5 մոդելները, լիովին նոր X5 մոդելը եւ իհարկե իր ֆուտուրիստական i3 եւ i8 լիովին էլեկտրական մոդելները:
VW-ն պատրատել է մի առեղծվածային կոնցեպտ եւ Golf մոդելի մեծ թվով թարմացված տարբերակներ:
Audi-ն կներկայացնի իր թարմացված դրոշակակրի A8 եւ S8 մոդելները, սպորտային քրոսսովեր SQ5-ը եւ բավականին հետաքրքիր մոդել Audi Sport Quattro կոնցեպտը՝ 691 ձիաուժ հզորությամփ:
Իհարկե, նման միջոցառումներին լինում են հաճելի եւ անսպասելի անակնկալներ, որոնց մասին մենք անպայման կպատմենք մեր լրահոսում: Սեպտեմբերի 9-ից մենք կաշխատենք Ֆրանկֆուրտում, թարմացումներին կարող եք հետեւել նաեւ սոցցանցերի մեր էջերում`
https://www.facebook.com/auto.am,
http://www.odnoklassniki.ru/auto.am:
