Զգուշացեք խարդախներից

Հարգելի այցելուներ եւ օգտատերեր

Մենք կարեւորում ենք ձեր արձագանքները եւ առաջարկները մեր աշխատանքի վերաբերյալ։ Պարբերաբար մենք տեղյակ ենք պահում ձեզ այն փոփոխությունների մասին, որոնց նպատակն է ավելի հարմար եւ անվտանգ դարձնել մեր կայքից օգտվելը։

Մենք առաջինն ենք գործարկել Հայաստանում sms -ների միջոցով հաշիվը հաստատելու ձևը, ինչը թույլ է տալիս ֆիլտրել անցանկալի գրանցումները եւ կասկածելի առաջարկները, հատկապես, արտասհամանից, որոնց նպատակն է գումար շորթել մեր գնորդներից։

Մենք մշտապես հետեւում ենք մեզ մոտ գրանցվողներին եւ մոնիտորինգի ենթարկում նրանց առաջարկները, եւ կասկած ունենալու դեպքում՝ արգելափակում դրանք:

Ցավոք, շատերը չեն հետեւում անվտանգության տարրական կանոններին ու մեր զգուշացնումներին։  

- Տարբեր օգտատերեր, ավտոմեքենայի մասին տեղեկություններ տրամադրելու պատրվակով, գնորդներին առաջարկում են զանգահարել, կամ հեռախոսազանգը վերահասցեագրում են այլ համարների, օրինակ, 090000087 համարին: Զանգ կատարելուց հետո նրանց հաշիվներից, առանց զգուշացման, գանձվում է 800 -1000 դրամ։

Մենք մշտապես արգելափակում ենք այդ հաշիվները եւ խնդիրը լուծելու նպատակով դիմել ենք նաեւ այդ համարների տեխնիկական սպասարկումն իրականացնող ընկերությանը: Խորհուրդ ենք տալիս ձեզ անմիջապես դադարեցնել հեռախոսազանգը, երբ պարզ է դառնում, որ այն վերահասցեագրվում է մեկ այլ համարի:

Բացի այդ, եթե ձեզ արտասահմանից առաջարկում են կանխավճար կամ ողջ գումարը փոխանցել վաճառողին ինտերնետով կամ բանկով, խուսափեք նման գործարքներից եւ նման օգտատերերի հետ շփումներից: Իհարկե, եթե դրանք պաշտոնական ընկերություններ չեն:

Վերջերս արտասահմանից խաբեությամբ 4000$ գումար են շորթել հայաստանյան գնորդից։ Տեղադրելով շատ էժան գնով ավտոմեքենայով հայտարարություն եւ դրանով գրավելով հաճախորդի ուշադրությունը, հետագայում նամակագրությամբ, համոզել են ամբողջ գումարը նախապես փոխանցել այսպես կոչված վաճառողին։ Գումարը ստանալուց հետո այդ անձերը անհետացել են։

Մեր հաճախորդներից մեկը մեզ տրամադրել է նման խարդախների հետ նամակագրությունը, որը ներկայացնում ենք ձեր ուշադրությանը:

Խնդրում ենք զգույշ լինել հետեւյալ դեպքերում.

- եթե կասկածելի հայտարարություններ եք տեսնում՝ կասկածելի ցածր գներով,

-  եթե զանգահարելուց ձեզ խնդրում են զանգահարել այլ հեռախոսահամարի, երբ հնարավոր է ձեր բջջայինից լրացուցիչ գումար գանձվի,

-  եթե արտասահմանից վաճառողը ձեզանից կանխավճար է պահանջում ավտոմեքենան ուղարկելու համար,

Խնդրում ենք, նման դեպքերում պարզապես սեղմեք Բողոքել կարմիր կոճակը եւ մանրամասն նկարագրել խնդիրը եւ մենք արագ կարձագանքենք։

Այդ կոճակը գտնվում է ավտոմեքենայի հայտարարության նկարների տակ:

Հուսով ենք, միասին մենք առավել կբարելավենք կայքի աշխատանքը

Շնորհակալություն Auto.am կայքի ծառայություններից օգտվելու համար։

Հարգանքով՝ Auto.am

Facebook Odnoklassniki

40942 դիտում