Մանրամասներ ճանապարհային երթեւեկության խախտումների տուգանքների առաջարկվող վերանայման մասին

Երեւան: Մեդիամաքս: ՀՀ կառավարությունն այսօր հավանություն է տվել «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» նախագծին, որով վերանայվել են Ճանապարհային երթեւեկության խախտումների համար գործող տուգանքները:

ՀՀ արդարադատության նախարարի տեղակալ Արմեն Մկրտչյանն այսօր ասել է, որ նախագիծը սահմանված կարգով ներկայացվել է ԱԺ:

Այն մշակվել է ՀՀ վարչապետի որոշմամբ ստեղծված հատուկ աշխատանքային խմբի կողմից: Նախագծի համաձայն, լուսացույցի արգելող ազդանշանի կամ կանգառ կատարելու երթեւեկությունն արգելող ճանապարհային նշանի առկայության դեպքում վարորդի կողմից կանգ գծի պահանջը չկատարելու համար նախատեսված 10 000 դրամ տուգանքը կփոխարինվի 5 000-ով, վարորդի կողմից կանգառի կայանման կանոնները խախտելու եւ տրանսպորտային միջոցի արտահանումը հատուկ պահպանվող տարածք գործող 40 000 դրամի փոխարեն ենթադրում է 20 000 դրամ տուգանք, վարորդի կողմից, բացառությամբ կանոնավոր ուղեւորափոխադրումներ իրականացնող տրանսպորտային միջոցի վարորդների, ընդհանուր օգտագործման տրանսպորտային միջոցների կանգառի կետի տարածքում կանգառ կատարելը կամ երթեւեկելի մասին ոչ զուգահեռ կայանելը գործող 10 000 դրամի փոխարեն կենթադրի 5 000 դրամ տուգանք:

Տրանսպորտային միջոցը հետիոտնային անցման վրա կայանելու տուգանքը 20 000 դրամի փոխարեն կլինի 15 000 դրամ:

Փոփոխություններ են սպասվում նաեւ երթեւեկության սահմանված արագության գերազանցման համար նախատեսված տուգանքի չափերում: Օրինակ` երթեւեկության սահմանված արագությունը 1-10 կմ/ժ-ով գերազանցելու գործող 10 000 դրամ տուգանքը կփոխարինվի յուրաքանչյուր գերազանցվող կմ-ի դիմաց 1000 դրամով, 11-13 կմ/ժ-ի դեպքում` 30 000 դրամի փոխարեն յուրաքանչյուր գերազանցված կմ-ի համար նախատեսվում է 1500 դրամ տուգանք, 31-50 կմ/ժ-ի դեպքում 50 000 դրամ տուգանքը կփոխարինվի 100 000 դրամով, 51-81 կմ/ժ-ով գերազանցելու դեպքում՝ 70 000 դրամի փոխարեն կկիրառվի  200 000 դրամ տուգանք, 81 կմ/ժ. եւ ավելի արագության գերազանցման համար տուգանքի գումարը կկազմի  500 000 դրամ:

Առանց վարորդական վկայականի կամ այլ փաստաթղթի տրանսպորտային միջոց վարելու տուգանքը 5000-ի փոխարեն կդառնա 3000 դրամ:

Նախագծով փոփոխություն է կատարվել նաեւ ընդհանուր օգտագործման տրանսպորտային միջոցում կամ թեթեւ մարդատար տաքսի ավտոմոբիլներում ծխելու համար նախատեսված տուգանքի չափում` 5 000 դրամից այն կդառնա 20 000 դրամ:

Facebook Odnoklassniki

20867 դիտում