Տուգանքների չափերը կարող են կրճատվել 50 տոկոսով

remove_red_eye6458

 

Երեւան: Մեդիամաքս: ՀՀ կառավարությունն առաջարկում է ճանապարհային երթեւեկության կանոնների հաճախակի խախտման համար նախատեսված տուգանքի չափը նվազեցնել 50 տոկոսով:

Այսօր կայացած ՀՀ կառավարության արտահերթ նիստում հավանության է արժանացել Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու օրենքի նախագիծը, որը կազմել է ՀՀ վարչապետի 2014թ. մարտի 27-ի որոշմամբ ստեղծված ճանապարհային երթեւեկության կանոնների հաճախակի խախտման համար նախատեսված տուգանքի չափերի վերանայման աշխատանքային խումբը:

Նախագծով վերանայվել են սահմանված արագությունը գերազանցելու համար նախատեսված տուգանքների չափերը՝ հիմնվելով վարչական իրավախախտումների հանրային վտանգավորության աստիճանի վրա: 1-20 կմ/ժ-ով սահմանված արագությունը գերազանցելը առաջացնում է տուգանքի նշանակում՝ յուրաքանչյուր գերազանցված կմ/ժ արագության համար նվազագույն աշխատավարձի՝ հազար դրամի չափով:

«Մեծ զիջում ենք անում, տուգանքների չափը նվազեցնում ենք 50 տոկոսով, նաեւ առաջարկում, որ նոր օրենքն ուժի մեջ մտնի ոչ թե ս.թ. սեպտեմբերի 1-ին, ինչպես ծրագրվում էր, այլ անմիջապես՝ օրենքն ընդունելու պահից», - ասել է ՀՀ վարչապետ Հովիկ Աբրահամյանը: