Chevrolet ապրանքանիշի պաշտոնական ներկայացուցիչ՝ “Վեկար” ընկերությունը առաջին անգամ Հայաստանում ներկայացրեց One World Football նախագիծը, որը կրում է սոցիալական բնույթ: Ողջ աշխարհով մեկ իրականացվող այս լայնամասշտաբ ծրագրի շրջանակներում Chevrolet-ն բաժանում է շուրջ 2.500.000 գնդակներ, որոնցից 50-ը բաժին էր հասել Հայաստանում ծրագրի գործընկեր՝ SOS մանկական գյուղերին, որոնք գտնվում են Կոտայքում եւ Տավուշի մարզում եւ որտեղ բնակվում են շուրջ 140 սոցիալապես անապահով երեխաներ:
Միջոցառումը կազմակերպվեց մայիսի 30-ին Իջեւանում եւ նվիրված էր երեխաների պաշտպանության միջազգային օրվան: Հաշվի առնելով ծրագրի սոցիալական կարեւորությունը եւ այն սերը, որ աշխարհով մեկ վայելում է ֆուտբոլը՝ որպես երեւույթ, “Վեկար” ընկերությունը հրավիրել էր նաեւ ՀՀ 2013-2014թթ ֆուտբոլի առաջնության չեմպիոն՝ “Բանանց” ֆուտբոլային ակումբի ֆուտբոլիստներ՝ Վալտեր Պողոսյանին, Արամ Շահնազարյանին եւ Սեմյոն Մուրադյանին, ովքեր ոչ միայն գնդակներ նվիրեցին, երեխաներին, այլեւ երկկողմանի հանդիպում անցկացրեցին SOS մանկական գյուղի թիմի հետ:
Ինչպես նշեց “Վեկար” ընկերության մարքեթինգի բաժնի ղեկավար՝ Արտյոմ Պետրոսյանը. “Շեւրոլեն մշտապես աչքի է ընկնում իր պատասխանատու մոտեցմամբ սոցիալական հարցերին, եւ պատահական չէ, որ այս անգամ էլ ընտրվեց այնպիսի մի երեւույթ, ինչպիսին է ֆուտբոլը, որը միավորում է մարդկանց՝ պարգեւելով բազում ուրախ եւ անմոռանալի պահեր: Մենք համոզված ենք, որ այս երեխաների մեջ կան իրոք տաղանդավոր տղաներ, ովքեր մոտ ապագայում կարող են զգալի հաջողությունների հասնել սպորտի բնագավառում եւ ուրախ ենք, որ կարող ենք մեր թեկուզ փոքր ավանդն ունենալ այս հարցում” :
Հավաքվածները, որոնց թվում էին նաեւ Տավուշի մարզպետարանի, Աշխատանքի եւ սոցիալական հարցերի նախարարության, արտասահմանյան մի շարք դեսպանատների ներկայացուցիչներ, հնարավորություն ստացան ծանոթանալու նաեւ վերջերս շուկայում հայտնված Chevrolet Malibu ավտոմեքենային:
