2013-ին Հայաստանում ՃՏՊ-ների թիվը նախորդ տարվա համեմատ աճել է 8.5%-ով

Երեւան: Մեդիամաքս: 2013 թ-ին Հայաստանում գրանցվել է 2824 ճանապարհատրանսպորտային պատահար (ՃՏՊ), որոնց հետեւանքով զոհվել է 316, տարբեր աստիճանի մարմնական վնասվածքներ ստացել 3994 մարդ:

Այս մասին այսօր լրագրողների հետ հանդիպմանը հայտարարել է ՀՀ Ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:

Վիճակագրության համաձայն, 2013-ին գրանցված ՃՏՊ-ները 2012-ի համամատ աճել են 8.5%-ով՝ պատահարների քանակն աճել է 222-ով, զոհերի թիվը` 5-ով, վիրավորներինը՝ 255-ով: ՃՏՊ-ների 25-30%-ը սահմանված արագության գերազանցման, 8-9%-ը՝ ոչ սթափ վիճակում վարող վարորդների մասնակցության հետեւանք է:

ՃՏՊ-ների աշխարհագրությամբ առաջատարը Տավուշի մարզն է: Այստեղ 2013 թ-ին 2012-ի համեմատ ՃՏՊ-ներն ավելացել են 30-ով, զոհերի թիվն աճել է 7-ով, վիրավորներինը՝ 51-ով: Երկրորդ տեղում Գեղարքունիքի մարզն է, որտեղ պատահարների թիվն աճել է 16-ով, զոհերի թիվը՝ 10-ով, վիրավորներինը՝ 7-ով:

«Վերջին 5 տարիների ընթացքում Հայաստանի ավտոմոբիլային պարկը թարմացվել է շուրջ 150 հազար նոր ժամանակակից տրանսպորտային միջոցներով: 2009-ին կառավարությունն ընդունեց Ճանապարհային երթեւեկության անվտանգության ապահովման հնգամյա ռազմավարություն, եւ ոստիկանության առջեւ խնդիր դրվեց 5 տարվա ընթացքում  ՃՏՊ-ների զոհերի թիվը կրճատել 10%-ով, ինչն արդեն իրականություն է: Առաջիկա 5 տարվա ընթացքում խնդիր է դրվել կանխարգելիչ աշխատանքների իրականացման շնորհիվ հասնել ՃՏՊ-ների ընթացքում մահացության դեպքերի եւս 10% նվազման»,- հայտարարել է ՃՈ ճանապարհապարեկային ծառայության բաժնի պետը` հավելելով, որ 2014-ի պլաններում հատուկ տեղ է հատկացվելու երեխաների հետ տարվող  աշխատանքներին:

Դա պայմանավորված է 2013 թ. ընթացքում մինչեւ 16 տարեկան երեխաների մասնակցությամբ պատահարների մեծ թվով: 2013-ին գրանցվել է մինչեւ 16 տարեկան երեխաների մասնակցությամբ 303  պատահար՝ մեծամասնությամբ, հետիոտնի վրաերթեր, որոնց  հետեւանքով զոհվել է 20, վիրավորվել 345 երեխա:

Անդրադառնալով նախորդ տարիների վիճակագրությանը՝ նշենք, որ 2010 թ-ին գրանցվել է 1974 պատահար, 294 զոհ, 2670 վիրավոր, 2011 թ-ին՝ 2319 պատահար, 327 զոհ, 3354 վիրավոր, 2012 թ-ին՝ 2602 պատահար, 311 զոհ, 3739 վիրավոր:
Հայաստանի ողջ պատմության ընթացքում վթարայնության տեսանկյունից ամենաանբարենպաստ տարին համարվում է 2008-ը, երբ հանրապետությունում ՃՏՊ-ների հետեւանքով զոհվել է 407 մարդ:

Ի դեպ, այս տարվա հունվարի 23-ի դրությամբ արդեն իսկ գրանցվել է 142 ՃՏՊ, զոհվել է 14, վիրավորվել 217 մարդ: Զոհերի թիվը նախորդ տարվա նույն ժամանակահատվածի համեմատ 6-ով պակաս է:

Facebook Odnoklassniki

2631 դիտում