Ուսանող իրավաբանը շահել է մեքենայի մաքսազերծման դատը

Ազատություն ռադիոկայանի հաղորդմամբ, սեպտեմբերի 24-ին Վերաքննիչ վարչական դատարանը բավարարել է ուսանող իրավաբան Սերգեյ Գրիգորյանի՝ Ճապոնիայից ներկրած մեքենան ցածր մաքսատուրքով մաքսազերծելու հայցը։

Վերաքննիչ վարչական դատարանը որոշել է բեկանել Վարչական դատարանի մարտի 15-ին կայացրած վճիռը: Վերաքննիչ վարչական դատարանը որոշեց Հայաստանի կառավարությանն առընթեր Պետական եկամուտների կոմիտեին (ՊԵԿ) պարտավորեցնել Սերգեյ Գրիգորյանի ներմուծած MERSEDES-BENZ մակնիշի մեքենան մաքսազերծել գործարքի գնի մեթոդով, այսինքն՝ 2000 դոլարով ավելի ցածր մաքսատուրքով, քան անցյալ տարվա մայիսին պահանջել էին մաքսային տեսուչները:

Վերաքննիչ վարչական դատարանը որոշել է նաև անվավեր ճանաչել ՊԵԿ նախագահի առաջին տեղակալ Արթուր Աֆրիկյանի գրությունը: Աֆրիկյանը մերժել էր քաղաքացի Սերգեյ Գրիգորյանի դիմումը և որոշել էր, որ մեքենան պետք է մաքսազերծվի Մաքսային օրենսգրքի այն հոդվածով, որը նախատեսում է թանկ մաքսատուրք: Վերաքննիչ վարչական դատարանի այսօրվա որոշումն օրինական ուժի մեջ կմտնի մեկ ամսից: Մեկ ամսվա ընթացքում որոշումը կարող է բողոքարկվել Վճռաբեկ դատարանում:

«Այս որոշումը կարող է դառնալ նախադեպային, փաստորեն այս որոշմամբ որոշակիացվեց օրենքը, կարծում եմ, այսուհետ օրենքը գործողության մեջ կկիրառվի»,- դատարանի որոշումից հետո «Ազատություն» ռադիոկայանի հետ զրույցում ասաց Գրիգորյանը։

Նյութն ամբողջությամբ կարող եք կարդալ Ազատություն ռադիոկայանի կայքում:

Facebook Odnoklassniki

10830 դիտում