Երկու տարին մեկ Գերմանիայի ֆինանսական մայրաքաղաքում` Ֆրանկֆուրտում, անցկացվում է հերթական ավտոսրահը, որն այս տարի 65-րդ անգամ բացեց իր դռները լրագրողների եւ ավտոսիրողների առջեւ: Հոբելյանական այս ավտոսրահին գերմանացիները շատ լուրջ էին նախապատրաստվել:
Կարծես թե ֆինանսական ճգնաժամը շատ քիչ հետեւանքներ է թողել գերմանական ավտոարտադրողների վրա: Համենայնդեպս, նրանք շատ վստահ են նայում ապագային եւ ներկայացել էին բավականին հարուստ տաղավարներով, ասես, ցույց տալով, թե ո՞վ է ավտոաշխարհում եղանակ ստեղծողը:
Իհարկե, ճապոնացիները, կորեացիները եւ եվրոպական մյուս ավտոարտադրողները փորձում են պայքարել շուկայի համար եւ նույնպես ներկայացրել էին բավականին հետաքրքիր նորույթներ:
Եթե մի քանի բառով նկարագրենք ավտոսրահը, ապա գրեթե բոլոր ավտոմեքենաների վրա կարելի էր տեսնել այսպիսի պիտակներ` Eco, Hybrid, Blutec, Electrical: Ամեն նոր ավտոսրահով համոզվում ենք, որ ավտոարդյունաբերության էլեկտրականացումը ավելի ու ավելի լուրջ հիմքերի վրա է դրվում: Կարծում ենք, մոտ 5 տարի անց Հայաստանում եւս ականատես կդառնանք էլեկտրական ավտոմեքենաների ներկայության կտրուկ աճին:
Ներկայացնենք ամենահետաքրքիր նորույթները, որոնք մենք տեսանք Ֆրանկֆուրտի ավտոսրահում եւ կրկին շնորհակալություն հայտնենք Renault ընկերությանը հրավերի համար:
Das Auto. գերմանացիներ
Գերմանացիները միանշանակ ցույց տվեցին, որ ավտոմոբիլային ապագան տեսնում են «կանաչ» տեխնոլոգիաներով: Նման մոտեցում երեւում էր ոչ միայն քաղաքային փոքր եւ համեստ ավտոմեքենաների դեպքում, այլեւ այնպիսի սպորտային մեքենաների, ինչպիսիք են BMW i8-ը եւ Audi Quattro Sport e-tron-ը: Ցուցահանդեսի ամենագլխավոր մեքենաներից մեկը, իհարկե, BMW i3 ն էր, որը ավտոսրահի ներսում կարելի էր օգտագործել որպես տաքսի եւ արդեն ռեալ տեսնել էլեկտրական ավտոմեքենաների ապագան: Mercedes-ը, իհարկե, չեր կաչող ետ մնալ եւ հանրությանը ներկայացրեց իր լիովին նոր S-դասի, ինչպես իրենք են ասում, աշխարհի ամենալավ ավտոմեքենայի Hybrid տարբերակը՝ S500 PHEV մոդելը, 329 ձիաուժ V6 տուրբոդիզելով եւ 80 կիլովատ էլեկտրաշարժիչով: Հատկանշական է, որ 100 կմ համար ավտոմեքենան ծախսում է ընդամենը 3 լիտր վառելիք!!!
Եթե այս ավտոսրահում լիներ «Ամենագլխավոր ավտոմեքենա» անվանակարգ, ապա միանշանակ կշահեր Porsche 918 Spyder հիբրիդային սուպերքարը, գինը՝ սկսած 645.000 եվրոյից, 887 ձիաուժ հզորությամբ, 4.6 բենզինային շարժիչով՝ գումարած էլեկտրական շարժիչները: Այս «հրեշը» 100 կմ/ժ արագություն է զարգացնում ընդամենը 2.8 վայրկյանում:
Volkswagen-ի տաղավարում գլխավոր նորությունը էլեկտրական e-Golf-ն էր, որի մարտկոցները կարելի է 80 տոկոսով լիցքավորել ընդամենը 30 րոպեում: Ավտոմեքենան կունենա 115 ձիաուժ հզորություն:
Skoda-յի տաղավարը բավականին մեծ էր, բայց որպես հետաքրքիր նորույթ կարելի է նշել Skoda Rapid Spaceback-ը, որը վաճառքում կլինի այս տարի հոկտեմբերից: Հայաստանում այն կտեսնենք հավանաբար այս տարվա վերջին կամ 2014թ. սկզբին: Ավտոմեքենան կառաջարկվի 75 եւ 122 ձիաուժ հզորությամբ շարժիչներով, իսկ ամենատնտեսող՝ GreenLine տարբերակի վառելիքի ծախսը կկազմի ընդամենը 3.8 լիտր 100 կմ համար:
Drive the Change. ֆրանսիացիներըԻզուր չէ Renault-ն ընտրել այս կարգախոսը: Նա ֆրանսիական եռյակի առաջատարն է եւ բոլորից առավել վստահ է իրեն զգում ճգնաժամի պայմաններում: Renault-ն բավականին ճկուն գտնվեց, եւ այսօր ընկերությունը եվրոպական արտադրողների մեջ ամենաշատ էլեկտրական ավտոմեքենա արտադրողն է, իսկ իր Duster, Logan, Sandero շարքով կարողանում է վաճառքների լավ ցուցանիշներ արձանագրել զարգացող երկրներում:
Peugeot-ն ներկայացրեց նոր սերնդի 308 մոդելը, որի հետ ընկերությունը մեծ հույսեր է կապում: Citroen-ի տաղավարում ամենահետաքրքիրը Cactus-ն էր. այս մոդելը նույնպես ետ չի մնացել ժամանակակից տրենդից եւ աշխատելու է հիբրիդային շարժիչով:
Let’s Go Places and Grab your field. ճապոնացիներՃապոնական ավտոարտադրողներից ամենագլխավորի՝ Toyota(Lexus)-ի տաղավարում կարելի էր տեսնել միայն հիբրիդային եւ էլեկտրական ավտոմեքենաներ: Lexus-ի տաղավարում առանձնանում էր LF-NX կոնցեպտը, որի տեսքը ամբողջովին համահունչ էր նոր ֆիրմային L-Finesse դիզայներական փիլիսոփայության հետ: Հնարավոր է, Lexus-ի ապագա քրոսովերները հենց այսպիսի արտաքին ունենան: Toyota-ն հատուկ ներկայացրեց Yaris Hybrid-R սպորտային հեթչբեքը: Այս մեքենայի ընդհանուր հզորությունը 420 ձիաուժ է: Պատկերացնում եք նման փոքրիկ մոնստրին Երեւանի փողոցներում
Nissan & InfinitiNissan-ի տաղավարում գլխավոր նորությունը նոր X-Trail-ն էր, այդ պատճառով էլ այն ներկայացնում էր անձամբ Կարլոս Գոնը: Ավտոմեքենան կունենա AllMODE 4x4i համակարգ, շարժիչի մասին դեռ տեղեկություններ չկան: Նոր X-Trail-ի արտադրությունը կսկսվի 2014 թվականի առաջին կեսին: Այնպես որ, Հայաստանում մենք այն հավանաբար կտեսնենք 2014 թվականի վերջին:
Infiniti-ն ցուցադրեց Q30 կոնցեպտը, որն իր մեջ համատեղում է կուպեի, հեթչբեքի եւ քրոսովերի դիզայնի էլեմենտներ, իսկ գլխավոր թիրախը երիտասարդ գնորդներն են:
Mazda-ն ներկայացրեց շատ սպասված Mazda 3-ը, որի վաճառքները պետք է սկսվեն այս տարվա վերջին: Ավտոմեքենան հասանելի կլինի երկու նոր` SkyActive 1.5 եւ 2.0 լիտրանոց եւ մեկ հին` 1.6 լիտրանոց շարժիչներով:
Suzuki-ն համեստորեն ներկայացրեց իր նոր եւ սպասված iV-4 կոնցեպտը: Ամենահետաքրքիրը այս ավտոմեքենայում ALLGRIP նոր սերնդի լիաքարշակ տեխնոլոգիան է: Արտադրությունը սպասվում է 2015 թվականին:
New Thinking New Possibilities. կորեացիների Niro-ն եւ Hyundai i10-ըԱյս տարի Ֆրանկֆուրտում կորեացիները համեմատաբար համեստ էին ներկայացված: Kia-ն ցուցադրեց ֆուտուրիստական Niro քրոսովերի կոնցեպտը: Ավտոմեքենան կունենա 1.6 լիտրանոց բենզինային շարժիչ 160 ձիաուժով` գումարած 45 ձիաուժ էլեկտրական: Hyundai i10-ի մոտ պրեմիերայից հետո հավաքվել եին բավականին մեծ թվով լրագրողներ: i10-ին ծանոթանալու համար Hyundai–ի տաղավարին էր մոտեցել նաեւ VW Group–ի գլխավոր գործադիր տնօրեն Մարտին Վինտերկորնը (Martin Winterkorn), ով ուսումնասիրում էր նոր սերնդի i10-ը: Այս մեքենան սկսած 2007 թվականից A դասի վաճառքի առաջատարն է Եվրոպայում:
Go Further. ամերիկացիները` Ford, ChevroletFord-ը Ֆրանկֆուրտ էր բերել S-Max մոդելի կոնցեպտը եւ ներկայացրեց իր նոր պրեմիում ենթաբրենդը` Vignale-ը: Ford-ում ակնկալում են, որ այս մոդելային շարքի վաճառքները կկազմեն ընդհանուր վաճառքների 10%-ը:
Chevrolet-ն ներկայացրեց Camaro մոդելի կաբրիոլետ տարբերակը` 6.2 լիտրանոց V8 շարժիչով եւ 6 աստիճան ավտոմատ փոխանցման տուփով:
Արագ եւ էլեգանտ իտալացիները` Maserati, FerrariFerarri 458 Special` հենց այս պրեմիերային էին սպասում իտալական ամենահայտնի մակնիշի երկրպագուները: 600-ից ավելի ձիաուժ, 330 կմ/ժ արագություն եւ ընդամենը 3 վայրկյան 100 կմ/ժ զարգացնելու համար: Maserati-ն ներկայացրել էր իր պատմության մեջ ամենաբյուջետային եւ մասայական մոդելը` Ghibli, որը ստեղծված է Chrysler-ի հիմքի վրա: ինչպես նաեւ սահմանափակ քանակով հատուկ սերիայի Quarttroporte մոդելը` ընդամենը 100 օրինակ, Ermenegildo Zenga ի հետ համատեղ ստեղծված սրահով:
Արիստոկրատ անգլիացիները. Bentley, Aston Martin եւ Rolls RoyceBentley-ի տաղավարում ուշադրության կենտրոնում նոր Continental GT V8 S մոդելն էր: Այս ավտոմեքենան ներկայացված էր երկու թափքով` կուպե եւ կաբրիոլետ: 4 լիտրանոց շարժիչ, 528 ձիաուժ, 8 աստիճանի ավտոմատ ZF փոխանցման տուփ, 4.3 վարկյանում 100կմ/ժ եւ մինչեւ 309 կմ արագություն… Եվ այս ամենը շքեղ թափքում:
Aston Martin-ը իր տաղավարում ներկայացրել էր CC100 Speedster կոնցեպտը, որը ստեղծել էր հատուկ մակնիշի 100-ամյակի կապակցությամբ: Ավտոմեքենայի ներսում տեղադրված է 517 ձիաուժանոց V12 Vantage-ից վերցված շարժիչը, իսկ 100 կմ/ժ ավտոմեքենան զարգացնում է 4.2 վարկյանում: Ընդամենը արտադրվելու է 2 օրինակ:
Jaguar-ից սպասում էին առաջին քրոսովերը, եւ նա ներկայացրեց C-X17-ը: Ամբողջովին ալյումինե թափքով, շարժիչները Range Rover Evoque-ից` բենզինային 2 լիտրանոց 240 ձիաուժ հզորությամբ եւ դիզելային 2.2 լիտր 190 ձիաուժ հզորությամբ, 8 աստիճան ավտոմատ փոխանցման տուփով: Վաճառքը սպասվում է 2015-ից ոչ շուտ:
Դե իսկ Rolls Royce-ի տաղավարում մեքենաներին նայելիս, հասկանում ես, թե որոնք են ամենաշքեղ ավտոմեքենաները: Տաղավարի հենց կենտրոնում այցելուներին դիմավորում էր Rolls Royce Phantom Celestial-ը` նշանավորելով Phantom մոդելի արտադրության 10-ամյակը: Նոր հատուկ ներկ, դիոդային լուսային երկինք սրահում, նոր լուսարձակներ եւ այլ բազմազան շքեղ մանրուքներ, որոնք այս մեքենան ավելի ու ավելի եզակի են դարձնում:
Եվ ամենաթանկարժեք ավտոմեքենաներ արտադրողը` Bugatti VeyronԱվտոսրահի երեւի թե ամենաթանկարժեք ավտոմեքենաները կանգնած էին Bugatti մակնիշի տաղավարում. ամենաթանկարժեք եւ ամենաարագ, ամենահզոր ու բազմաթիվ «ամենաներ»:
Bugatti Veyron EB 16.4 Pur Sang` այս գիպերմեքենայից կարտադրվի ընդամենը 5 օրինակ, իսկ թափքը չներկված ալյումինից է:
