Սպասելով նոր Renault Sandero-ին

Սկզբից նշենք, ինչու՞ «սպասելով»: Renault Sandero-ի մուտքը Հայաստան սպասվում էր դեռ գարնանը, բայց ինչպես նշեցին Հայաստանում Renault մակնիշի ներկայացուցիչ Megna ընկերությունում, ավտոմեքենայի մուտքը հայկական շուկա դժվար թե կայանա մինչեւ աշուն: Պատճառը` չեն բավականացնում արտադրական հզորությունները: Հայաստանը հերթական անգամ առաջնահերթ շուկաների ցուցակում չէ. ի՞նչ արած, փոքր շուկա ենք:

Ցավալի է, իհարկե, որ ավտոմեքենայի մուտքը Հայաստան ուշանում է, քանի որ, մեր կարծիքով, Sandero-ն Հայաստանում կարող էր դառնալ այս տարվա վաճառքի հիթերից մեկը:

Renault Logan, Sandero եւ Sandero Stepway` այս 3 ավտոմեքենաները պատրաստված են մեկ հարթակի վրա, արտաքինից տարբերվում են, իսկ տեխնիկապես գրեթե նույն մեքենաներն են:

Արտադրողը պնդում է, որ ավտոմեքենաները էժանացել են 8%-ով, իսկ տեխնիկապես ավելի լավ են հագեցած:

5-դռնանոց Sandero հեթչբեքը ստեղծված է Renault Logan-ի բազայի վրա, որի մասին մենք մանրամասն գրել էինք մեր թեսթ-դրայվում` 1.4 լիտրանոց 75 ձիաուժանոց, 1.6 լ` 84 ձիաուժանոց եւ 1.6լ` 102 ձիաուժանոց շարժիչներով:

Renault Sandero (հենց ինքը Dacia Sandero)-ն արտադրվում է 2007 թվականից, իսկ  Renault Sandero Stepway-ն, որն էլ մենք փորձարկում էինք Ուկրաինաում,  տարբերվում է սովորական հեթչբեքից 2 սանտիմետր ավելացված լուսաճեպքով եւ նոր պլաստմասե երեսպատումներով:

Մեր տպավորությունները

Արտաքին տեսքը

Նոր, ավելի սլացիկ եւ արտահայտիչ դիզայն, ավելացված քլիրենս, որի պատճառով Sandero Stepway-ը ստանում է ամենագնաց մեքենայի բնավորության գծեր, ինչը միանշանակ ավելի հրապուրիչ կդարձնի ավտոմեքենան հայաստանցի գնորդների աչքերում: Սլացիկ առաջնամաս, ավելի մեծ լուսարձակներ, մեծ տարբերանշան, գույները ավելի գեղեցիկ են, բազմազան ու ժամանակակից:

Ինտերիերը եւ սարքավորումները

Ինտերիերն ու սարքավորումները գրեթե ամբողջությամբ նման են Logan-ին: Այն ամբողջովին զրոյից է մշակված: Առաջին անգամ ավտոմեքենան նստելիս տպավորությունը միանշանակ այնպիսին է, որ նստած ես ավելի թանկարժեք եւ դասով բարձր ավտոմեքենայում, իսկ երբ շոշափում ես սրահի նյութերը, հասկանում ես, որ դրանք պատրաստված են բավականին կոշտ պլաստմասից: Նույնիսկ ամենապարզ կոմպլեկտավորմամբ Renault Stepway-ն ունի կոնդիցիոներ եւ աուդիոհամակարգ` USB մուտքով, Bluetooth կապով, ինչպես նաեւ երկու անվտանգության բարձիկներ, մանկական նստատեղի հատուկ ֆիքսելու տեղ եւ իմոբիլայզեր: Ցանկության դեպքում նույնիսկ բազային տարբերակում կարելի է ավելացնել կողային անվտանգության բարձիկներ, կրուիզ-կոնտրոլ եւ մուլտիմեդիա համակարգ` նավիգացիայով: Ցավոք, մեզ տեղեկացրեցին, որ Հայաստանում նման նավիգացիոն համակարգով կոմպլեկտավորված ավտոմեքենաներ չեն վաճառվելու:

Տպավորությունները վարելիս

Renault Logan-ի թեսթ-դրայվի մասին նյութում մենք արդեն նշել էինք, որ այն անցել էր Ուկրաինայում` Ղրիմյան թերակղզում, եւ կազմակերպիչները շատ լավ ու ճիշտ վայրեր էին ընտրել ավտոմեքենան լիովին հասկանալու ու վարելու համար: Նշեմ այն ամենակարեւոր տպավորությունները, որ թողեց մեր վրա Renault Sandero Stepway-ը: Ավտոմեքենան զարմանալիորեն փափուկ էր կլանում ճանապարհային անհարթությունները, ինչը շատ կարեւոր է Հայաստանի ավտոճանապարհների ներկայիս վիճակի պայմաններում:



Բարձր արագությունների ժամանակ շրջադարձեր կատարելիս, նույնիսկ հաշվի առնելով Sandero Stepway-ի ավելացված քլիրենսը, ավտոմեքենան շատ վստահ էր իրեն պահում: Ղրիմյան լանդշաֆտի պայմաններում, որը շատ դեպքերում հիշեցնում էր Հայաստանը, հատկապես Դիլիջանի հատվածում, մեքենայի հզորությունը բավականացնում էր հանգիստ բարձրանալ բավականին կտրուկ բարձրունքները:

Ավտոմեքենայի սրահում բավականին հարմարավետ էր եւ անաղմուկ, նստատեղերը իր դասի մեքենայի համար բավականին հարմարավետ էին եւ թեսթ դրայվի ավարտին ոչ մի հոգնածություն չկար: Միանշանակ, Sandero Stepway-ով կարելի է երկար ճանապարհներ «ընկնել»: Օրինակ, Երեւանից Բաթումի ամառային հանգստի ժամանակ:

Չնախատեսված կանգառ (վթար թեսթ-դրայվի ժամանակ)

Գրեթե յուրաքանչյուր թեսթ-դրայվի ժամանակ լինում են վթարային դեպքեր, եւ մեր գործընկերներն ահա այսպիսի վթարի էին ենթարկվել: Բախտի բերմամբ, մեքենան չէր ընկել ձորը. փրկել էին ճանապարհի արգելակները, եւ ոչ մեկը լուրջ վնասվածքներ չէր ստացել: Եվ դա եւս մեկ վկայություն է, որ նոր ավտոմեքենայում բավականին բարելավվել է թափքի ամրությունը:



Եզրակացություն

Renault Sandero Stepway-ը միանշանակ արժանի է ձեր ուշադրությանը: Եթե դուք փնտրում եք նոր ավտոմեքենա ավտոսրահից ու ձեր միջոցները սահմանափակ են, ապա միանշանակ պետք է ուշադրություն դարձնել Renault Sandero-ի վրա: Ավելացնեմ մի պայման` Հայաստանյան դիլերին անհրաժեշտ է ներկայացնել լավ գնային առաջարկ: Renault ընկերության կողմից մեզ ներկայացված նախնական տեղեկատվությունում Հայաստանի համար ներկայացված էին հետեւյալ գները`

Renault Sandero
Authentique` սկսած 9020 եվրոից
Expression-ը` սկսած 9720 եվրոից

Sandero Stepway
9870-ից 10570 եվրո ամենաթանկ Expression կոմպլեկտացիան:

Նոր Renault Sandero 1.2 լ
- շարժիչ` 1.2 լ.
- հզորությունը` 75 ձիաուժ

Դինամիկ ցուցանիշները
- առավելագույն արագությունը` 156 կմ/ժ
- 0-100կմ/ժ` 14.5 վ.

Վառելիքի ծախսը
- քաղաքում`7.8 լ
- քաղաքից դուրս` 5.2լ
- խառը ցիկլում` 6.2լ
- վառելիքի բաքի ծավալը` 50լ

Չափերը
- բեռնախցիկի ծավալը` 320/1200 լ
- լուսաճեպք` 16,4 սմ

Նոր Renault Sandero 1.4 լ
- շարժիչ` 1.4 լ.
- հզորությունը` 75 ձիաուժ

Դինամիկ ցուցանիշները
- առավելագույն արագությունը` 156 կմ/ժ
- 0-100կմ/ժ` 13.0 վ.

Վառելիքի ծախսը
- քաղաքում`9.4 լ
- քաղաքից դուրս` 5.5լ
- խառը ցիկլում` 6.9լ
- վառելիքի բաքի ծավալը` 50լ

Չափերը
- բեռնախցիկի ծավալը` 320/1200 լ
- լուսաճեպք` 16,4 սմ

Նոր Renault Sandero Stepway 1.6 լ
- շարժիչ` 1.6 լ.
- հզորությունը` 80 ձիաուժ

Դինամիկ ցուցանիշները
- առավելագույն արագությունը` 164 կմ/ժ
- 0-100կմ/ժ` 12.8 վ.

Վառելիքի ծախսը
- քաղաքում`9.0 լ
- քաղաքից դուրս` 5.8լ
- խառը ցիկլում` 7լ
- վառելիքի բաքի ծավալը` 50լ

Չափերը
- բեռնախցիկի ծավալը` 320/1200 լ
- լուսաճեպք` 19,3 սմ:

Տեքստը եւ լուսանկարները` Կարեն Անտոնյան