Renault-ը կունենա “կրքոտ, էմոցիոնալ եւ զգայական մեքենաների շարք”

Renault-ի շեֆ-դիզայներ Լոուրենս վան դեն Ակերի (Laurens van den Akker) հարցազրույցը Auto.am կայքին:

Ինչպես հայտնի է, ավտոգնորդը շատ դեպքերում իր վերջնական ընտրությունը կատարում է հենց էմոցիոնալ ազդեցության տակ, եթե մեքենայի դիզայնը աչք է շոյում եւ էմոցիոնալ է:

Ավելորդ է ասել նաեւ, որ ավտոմեքենայի դիզայնը ամենադժվար իրագործելի նախագծերից  է: Այդ իսկ պատճառով լավ դիզայներները չափազանց պահանջված են ավտոարտադրողների մոտ: Եվ հաճախ դիզայներները մեկ արտադրողից տեղափոխվում են մյուսին:

Հայտնի հոլանդացի ավտոդիզայներ Լոուրենս վան դեն Ակերը վերջերս զբաղեցրեց Reanult-ի շեֆ-դիզայների պաշտոնը: Դա մեր կարծիքով ավելի մեծ իրադարձություն է Renault-ի համար, քան հոլանդացու, քանի որ Renault մակնիշը արդեն երկար ժամանակ է դիզայնի վերաբերյալ նոր գաղափարների կարիք ուներ:

Լոուրենս վան դեն Ակեր ծնվել է 1965 թվականին: Հոլանդիայի Դելֆտ քաղաքի Տեխնոլոգիական համալսարանում ուսումն ավարտելուց հետո սկսել է իր կարիերան Design System srl-ում Թուրինում: 1998 թվականից աշխատել է Ford ընկերությունում: 2006 թվականին նա գլխավորել է Mazda-ի դիզայն ստուդիան: Հենց այդ ժամանակ էլ ստեղծվեց Mazda ընկերության ավտոմեքենաների ժամանակակից շարքը:

Մեր գործընկեր DeemCommunications ընկերության շնորհիվ մեզ հաջողվեց զրուցել Լոուրենս վան դեն Ակերի հետ:

- Ինչ-որ մի տեղ կարդացել եմ, որ օտարեկրացիներին հաջողվում է լավ աշխատել մեքենայի արտաքին հարդարանքի եւ ձեւի վրա, սակայն նրանք դժվարանում են մեքենային ճապոնական շունչ հաղորդել: Որպես եվրոպացի ինչպե՞ս Ձեզ հաջողվեց աշխատել Ճապոնիայում եւ արդյո՞ք Դուք կարողացաք մեքենաներին իսկական ճապոնական շունչ հաղորդել:

- Երբ աշխատում ես տարբերվող մշակույթով մի երկրում, շատ կարեւոր է ոչ թե ընդդիմանալ այդ մշակույթին, այլ ընդունել այն, եթե անգամ շատ դեպքերում չես ըմբռնում մշակութային բոլոր յուրահատկությունները: Դա տվյալ մշակույթի  կողմից ընդունվելու ամենաարագ միջոցն է:

Մեքենաներին «իսկական ճապոնական շունչ» հաղորդելը երբեք էլ իմ նպատակը չի եղել: Իմ նպատակն էր ստեղծել լավ Մազդա մեքենա, որը կմարմնավորեր շարժման զգայականությունը: Աշխատանքն անելով ամբողջ սրտով եւ խանդավառությամբ՝ մենք ստեղծեցինք նոր ճապոնական ոգով մեքենա:

- Որքանո՞վ էր դժվար անցնել ճապոնական ապրանքանիշից  ֆրանսիականին: Ո՞րն է մեքենայի դիզայնի ճապոնական եւ ֆրանսիական մոտեցումների հիմնական տարբերությունը:

- Ոճերը փոխելը սկզբում բավականին դժվար է, քանի որ ասես ամեն ինչ հարկավոր է նորից սկսել: Ստիպված ես սկսել զրոյից եւ վերստին ապացուցել քո արժանիքներն ու կարողությունները:

Երկուսն էլ հետաքրքիր եւ ուժեղ մշակույթներ են՝ հարուստ պատմությամբ եւ հպարտության զգացումով, եւ այս արժեքների վրա կարող ես հիմնվել:

Հիմնական տարբերությունը դիզայներական թիմի վերաբերմունքն է: Արեւելյան մշակույթում թիմն ամենայն հավանականությամբ կհետեւի քո գործին, եթե զգում է, որ այն կարող է ընկերությանը հաջողություն բերել: Իսկ արեւմտյան ընկերությունում անհրաժեշտ է մոտիվացնել դիզայներներին, քանի որ նրանք հարցին մոտենում են առավելապես որպես անհատականություն  եւ անձնական ուժեղ տեսակետներ ունեն:

- Դուք աշխատել եք գրեթե բոլոր մայրցամաքներում: Աշխարհի ո՞ր հատվածն եք նախընտրում: Իսկ միգուցե Ձեզ համար սահմաններ չկա՞ն:

- Ինձ համար յուրաքանչյուր մայրցամաքում գտնվելը զարմանալի եւ հարստացնող փորձառություն է: ԱՄՆ-ն տվել է ինձ ազատության եւ վստահության զգացում: Ճապոնիայում ականատես եմ եղել թիմային աշխատանքին եւ մտերմությանը: Եվրոպան օգնել է զարգացնել իմ ռազմավարական ինտուիցիան, քանի որ նրա մեկ ոտքը անցյալում է, իսկ մյուսը՝ ապագայում:

Ես փորձում եմ օգտագործել յուրաքանչյուր փորձ, քանի որ մեր բիզնեսը ամբողջովին դարձել է գլոբալ: Ես ընձեռված հնարավորություններից օգտվում եմ ամեն օր:

- Renault-ի  ներկայիս ավտոմեքենաների շարքի դիզայնը շատ բազմազան է: Կարծում եմ, դա միտումնավոր է արված: Ապագայում Renault-ի դիզայնի համար ո՞ր ուղղությունը կընտրվի:

- Մենք կդառնանք շատ ավելի միատարր՝ որպեսզի փողոցում տեսանելի ու ճանաչելի լինենք  իբրեւ ուժեղ ապրանքանիշ: Բայց միեւնույն ժամանակ կպահպանենք որոշակի բազմազանություն, քանի որ ստեղծում ենք մեքենաներ կյանքի տարբեր փուլերում գտնվող մարդկանց համար:

- Հույս կա՞, որ օրերից  մի օր կտեսնենք Renault-ի մեքենաները Dezir կամ Captur ոճում:

- Այո:

- Որքա՞ն հաճախ եք շփվում պարոն Կարլոս Գոնի-ի հետ: Արդյո՞ք նա կամ որեւէ այլ մենեջեր միջամտում են դիզայներների աշխատանքին: Միգուցե այդպիսի միջամտություն ընդհանրապես չկա՞:

- Ես պարբերաբար շփվում եմ Renault-ի Գլխավոր գործադիր տնօրեն Կարլոս Գոնի եւ գլխավոր գործառնական տնօրեն Կարլոս Տավարեսի հետ: Նրանք չեն միջամտում դիզայներական աշխատանքներին, սակայն դիզայնի ռազմավարության առնչությամբ տեղին եւ օգտակար հարցադրումներ են ներկայացնում: Այս քննարկումները շատ կարեւոր են ծրագրերի հետագա հաջողության համար:

- Մոտ ապագայում ի՞նչ կարող ենք սպասել Renault-ի դիզայներներից:

- Կրքոտ, էմոցիոնալ եւ զգայական մեքենաների շարք, որոնք հուսով եմ ձեզ կրկին  կսիրահարեցնեն Renault ապրանքանիշին:

- Այժմ որ՞ն է Ձեր մոտիվացիայի եւ ներշնչանքի հիմնական աղբյուրը:

- Իմ դիզայներական թիմը, որը շատ միջազգային է (25 տարբեր ազգություններ) եւ սփռված է աշխարհի 5 տարբեր վայրերում (Սան Պաուլո, Սեուլ, Բուխարեստ, Մումբաի եւ Փարիզ); շրջագայելը; այն ամենը, ինչ կապված է մրցավազքի եւ  հատկապես «Ֆորմուլա 1» մրցումի հետ

- Ի՞նչ մեքենա եք այժմ վարում:

- Հատուկ պատվերով արտադրված արծաթագույն Megane RS:

Auto.am կայքը հատուկ շնորհակալություն է հայտնում Deem Communications ընկերությանը հարցազրույցի կազմակերպման հարցում աջակցության համար

Presentation - DeZir concept car (2010)

Renault - Captur concept car video clip

Renault - 2011 Geneva Motor show - Press conference

Facebook Odnoklassniki

3840 դիտում